ilmu jawi - adammakna

No.86 Tamba bayi ,bocah ,utawa wong tuwa,lara cacar wata(cangkrangen)

1.Jinten ireng,mesoyi,dlingo,bengle,angkup jambe kang nom 1,brambang 1,suruh kang temureose 3 lembar,kabeh kapipis binanyonan sathithik,kasaring banjur kaombekake.

2.Yen wis mlenthung,brambang lan kunci kamamah banjur kasemburake ing mripat saben esuk sore,nanging mamahan mau aja nganti ngenani(nyiprat) mripat,dadi mung kajupuk hawane bae bisane tumandhuk.Dene yen arep nyemburake kudu ngunekake montra dhisik mangkene:Bismillah hirokhmanirokhim,kanjul ngaras,kanjul ngalam,Bagus Karang aja perak-perak marang aku,pan aku anak putune Sayid pangeran.Bujang Galiman aja uruk sudi gawe marang aku,pan aku anak putune Bagus Karang.Loncang-lancing Nyai Rara Kidul aweh gabag cacar plenthing 10,9,8,7,6,5,4,3,2,1.Siji bae trima,trima saking kersaning Allah.

No.85 Tamba byi lara gabag lan cacar banyu

1.Yen lara gabag:babal,digodhog plencing(godhog so),lan adas pulawaras,kabeh kapipis binanyonan sathithik banjur diwedhakake ing badan sakojur tumeka sikil.

2.Yen lara cacar banyu:kemladheyan kelor lan adas pulawaras,kapipis kabanyonan sathithik banjur kawadhahake ing badan sakojur tumeka sirah.

3.Lara gabag lan cacar banyu mau tamba kang diombe yaiku:madu lan banyune degan ijo,sawise kaudhak banjur kaombekake kira-kira kehe sacangkir.

4.Dene paduhane lara gabag lan lara cacar banyu mau yaiku:tela gantung kang ijih nom(kates,uga ana kang ngarani gandhul) ing dhuwur sangisore gagang dikethok perlu kanggo bolongan anggone mbuwang isine,sawise isine dibuwang nganti resik,banjur diiseni:gabah,otek,jagung,botor,ketan ireng,kacang ijo,bata,edhi,beling,krikil,gereh pethek,kethokan kates mau banjur ditangkepake maneh kang kenceng,perlu kanggo nutupi bolongan mau,supaya kabeh kang wis diisekake aja nganti padha metu(wutah),kates mau banjur kabenem nganti mateng banget.Yen wis mateng banget kajupuk sarta banjur kabuwang ing kali,dene yen adoh kali,buwangen ing sumur bae sadurunge dibuwang kudu muni mangkene: heh sigabag sicacar banyu,sira aja pati-pati thukul,yen paduhan kang sun buwang kakelekake ing kali,(kang kacemplungake ing sumur) durung thukul.Sawise ngucap mangkono banjur kabuwang kakelekake ing kali utawa sumur.

No.84 Tamba anggarapsari

Yen anggarapsari krasa lara,lan ora temtu wektune,tetambane:temu lawak 7 iris,kunir 3 jenthik,asem kawak sapantese,lan gula jawa,banjur kagodhog dibanyoni 2 gelas,kakarekake sagelas,banjur diombe.Dene sasuwene anggarapsari uga ngombe tamba iku.

No.83 Tamba kepengin duwe anak

1.Yen kabener dina Anggarakasih(Selasa Kliwon),utawa Jumuah Kliwon goleka kemangga kang ngendhog,weteng lan endhoge jupuke banjur katelen nganggo gedhang mas.Nanging ing sadurunge kudu tetamba dhisik rupa:temu ireng gedhene saendhas pitik,kapipis binanyonan sawatara,diuyahi sajimpit,banjur kaombe,pangombene saben dina rebo lan sabtu pangombene mau sarampunge adus wuwung(adus wuwung dhidik).

2.Pala satugel,kayu timur,asem,kabeh kabakar,banjur kadeplok,kanggo tapel ing padharan,sapangisor,anggone napelake nganggo kapuk.

3.Legoning pakel,bonggol nampu,kausapake ing puruse priya kapipis banjur kadhahar ing wanita.

4.Bengle,bawang putih,jongrahab,manisjangan,kencur,suruh,banjur kapipis binanyonan sathithik banjur kaombe.

5.Cabe,lempuyang,jae,kapipis binanyonan sathithik banjur kaombe,ampase diwedhakake ing padharan lan sikil karo.

No 82 Tamba wanita murih kinasihan ing priya

1.Kembang dlima putih,yen oleh kang sungsun luwih becik,empu kunir,jinten ireng,kapipis binanyonan sarta diuyahi sajimpit banjur kaombe.

2.Gandarukem,isi jambe,cengkeh,pala,mesoyi,tlutuh sana,endhog,gambir jenitri,kapipis binanyonan jeruk pecel,banjur kaepe nganti garing kakempelake,dene pandhahare disisir mbaka sathithik banjur katelen.

3.Kala mangsa lan luwih prayoga yen bisa saben dina,nginanga nganggo suruh tangis sajodo,suruh temu rose,jambe wangen,gambir,enjet,cengkeh,kapulaga.Dubang sapisan kudu kaulu sasepahe luwih becik.

4.Dhahar rujak utawa lotis uga becik,dene kang dirujak tawa dilotis yaiku: pentil salah,pentil lo,babal,gedhang klutuk kang nom,empol,cengkir,mlandhingan kang nom durung ana isine,sanajan ana,nanging kang ijih cilik-cilik banget,bumbune miturut apa lumrahe,mung bae ora kena pedhes-pedhes,lomboke mung kanggo srana bae.

5.Yen ing bengi mentas salutut,esuke prayoga jejamu kang ginawe betotan nanas,suket jarem,godhong adhem-adhemati,godhong gagan-gagan,kunir putih,temu giring,temu ireng,temu lawak,empu kunir,jeruk pecel,uyah,kencur,dipipis binanyonan sapantese banjur kaombe.

No.81 Tamba ari-ari ora bisa metu

1.Tambanana:dhangkel kelor lan adas,kapipis binanyonan wedang banjur kaombe.

2.Utawa tambanana:babakan teler,bawang putih,kapipis binanyoan kaombe