No 46 Sasrahan(lamaran)

No 46 Sasrahan(lamaran)

Yen wis kurang 3,2, utawa sadina karo ijabing panganten,wong tuwane panganten lanang masrahake sasrahan(lamaran) marang wong tuwane panganten wadon(besan) wujud:

Kebo sarakit dikalungi cindhe,sarta sungune dicathok nganggo perak.Yen mung mburu cukup,sungune kene dienjeti bae,supaya katon putih,iku minangka gantine cathok perak.

Banyak sarta pitik padha nyajodho lanang wadon,panggawanane padha diemban nganggo cindhe utawa sindhur.Yen besane salah siji lagi ngandeg(meteng) pitike wadon diganti babon angrem.Apadene temuning panganten,pangantene kinurung ing lawe wenang satukel.

Jolen isi wit lombok,wit terong,wit parijata utawa ranti,padha nyarakit,sarta tebu arjuna sarakit,mung bar tebune ora diwadhahi jolen,nanging digawa ing uwong.

Jolen sisi beras lan krambil sajanjang,lan ana uga kambile mau pamikule ora diwadahi jolen,sarta kambile nganti 25 glundung akehe.

Jolen isi dandang,kendhil,ceret,kenceng,siwur,kabeh,saka tembaga,sarta iyan lan ilir.

Jolen isi gawangan,bandhul,wajan,canthing,lawon lan dhakon.

Jolen isi anggi-anggi,yaiku jamu galian,diwadhahi ing ponjen kang kinrodhongan ing cindhe,utawa diwadhahi bothekan,uga kinrodhongan cindhe,sarta dhuwit pecah 25 rupiah abang,diwadhahi kanthong(25 rupiah abang= +- f 20,84).

Jolen isi sega iwak lan lawuhan liya-liyane,sarta panganan rupa-rupa.

Dene yen salah sijine besan ana sing wis ajal,nganggo sasrahan bendhe.

Mungguh lakune sasrahan kebo sarakit ana ngarep dhewe,tumuli banyak lan pitik sakembaran lanang wadon,diemban cindhe utawa sindhur.Banjur tebu arjuna sapasang digawa(dicekel) uwong sarta jolen kang isi wit: lombok,terong,parijata utawa ranti.Kasambung jolen-jole liya-liyane.Apadene jodhang-jodhang kang isi sega iwak lan lawuhan sarta panganan,iku kang ana ing mburi.Lakuning sasrahan(lamaran) iku,sadalan-dalan dadi tontonaning uwong akeh.

Satekane ing panggonane wong tuwane pangnten wadon,kinormatan unining gamelan nalaganjur.Para tamu kakung kang angring sasrahan anjujug ing pandhapa,tamu estri lumebu ing omah mburi.