No.55 Slametan wong meteng

No.55 Slametan wong meteng

Slametan wong meteng yen wus oleh:

Sasi
1	1.Jenang abor-abor(sungsum),yaiku glepung beras kajenang diuyahi adune juruh santen
2	1.Sega janganan,yaiku tumpeng pinggire mubeng didedeki janganan,rupane janganan manut kalumrahane panggonane dhewe-dhewe,nanging cacahe kudu ganjul,upama janganan rupa 9,11,lan sabanjure,janji ganjil. 2.Jenang  abang,yaiku beras kajenang digulani jawa,(gula klapa). 3.Jenang putih,yaiku beras kajenang disanteni. 4.Jenang abang putih,yaiku jenang abang ditumpangi jenang putih,kang digawe kaya kasebut ing dhuwur iku. 5.Jenang baro-baro,yaiku katul dijenang disisiri gulo jowo lan parudan kambil. 6.pipis kenthel,yaiku glepung beras diuyahi lan disanteni,digulani jawa kasisir,banjur kawungkus didang. 7.Jajan pasar lan kembang boreh,yaiku sawarnaning jajan pasar dipepaki.
3	Slametane padha karo 2 sasi
4	1.Sega punar,yaiku sega wuduk dikuniri lan diasemi,lawuhe kebo siji(iwak daging lan sawarnaning jerohan sathithik-sathithik sapepake lan mata siji),nganggo sambel goreng. 2.Apem,glepung beras dicolok ragi digulani jawa. 3.Kupat,yaiku sawarnaning kupat janur:1.sinta,2.jago,3.sidalungguh,4.luwar
5	1.Sega janganan,kaya kasebut ing ndhuwur 2.Uler-uleran,yaiku glepung beras dijeri banyu diwowori nopal abang,kuning,ireng,lan liya-liyane,banjur digawe wangun uler. 3.Ketan mancawarna,yaiku ketan digawe rupa-rupa warna,sarta enten-enten,minangka adune pandhahare. Slametan 5 wulan iku,banjur nyaosi priksa para sanak sadulur,nyuwunake pangestu wilujeng,sarta nyaosi dhaharan diwadhahi takir dirangkepi janur kuning(takir ponthang) bitinge don warna 5,mas,suwasa,salaka,wesi,lan tembaga,lambarane tebok utawa lemper lemah.Isine takir ponthang sega wajar lan punar,lawuhane iwak gorengan kebo siji,tegese iwak sajerohane dipepaki,nganggo mata siji,lan panganan kang kanggo slametan,apadene rujak crobo.
6	Apem kocor,yaiku glepung beras dicolok ragi tanpa gula,nanging pandhahare nganggo juruh santen.
7	Jenenge tingkep,mriksanana slametan tingkepan
8	Bulus angrem,yaiku klepon ditutupi srabi putih kakurapake,srabi=buluse,klepon=endhoge kang diangremi.Klepon kang  digawe glepung ketan dijeri banyu diwenehi godhong katu utawa pandhan,utawa kara,diglindhing ing jero nanggo gula dikrawu.Dene srabi sing digawe glepung beras nganggo krambil dijer ing pangaron diolah ing sangan ditutupi.
9	Jenang procot,yaiku glepung beras dicuri gula santen,kajenang,yen wis satengah mateng,banjur didedeki oncek-oncekan gedhang wutuhan,yen wus mateng diwadhahi takir.

Dene yen wis 9 sasi tanggal tuwa lek 10,durung krasa nglarani,dislameti dhawet plencing,kang digawe pathi onggok digulani santen,didol,kang tuku bocah,nganggo dhuwit wingka,sanalika dhawete kudu diombe,yen wis diombe bocah mau banjur lumayu mlencing.

Katrangan: yen meteng mendeking,yaiku meteng kaping 3,5,7 sabanjure(meteng tiba ganjil) slametane nganggo sega loyang(sega garing didang),kayune galar amben,supaya suda rekasane lan slamet,marga meteng mendeking iku luwih rekasa anggone nglahirake jabang bayi.