No.56 Slametan tingkep

No.56 Slametan tingkep

Yen nggarbini (meteng 7 wulan),mbanjur tingkeban katibakake dina rebo utawa sabtu,ing tanggal ganjil sadurunge tanggal 15.

Kang nggarbini disirami lan dikramasi,dene aduse nganggo siwur kang isih ana kambile,(kambile ora dicukil),aduse nganggo banyu sekar setaman(banyu didedeki kembang).Dikosoki glepung beras mancawarna(warna 7) diwori mangir,pandan wangi lan godhong kemuning,kang ngedusi dhukune utawa sanak sadulure.Dene lungguhe ing dhingklik dilemeki: klasa lan godhong-godhongan:apa-apa,kluwih,kara,dhadhapsrep,alang-alang lan lemek kang bangsa sembet yaiku:letrek,jingga,banguntulak,sindur,sembagi,slendhang,lurik puluhwatu,yuyusekandhang,lan lawon.

Dene sajene:

1.Sega janganan lan jajan pasar.

2.Jenang:abang,putih,baro-baro lan jenang procot

3.Sega garing,kedhele,kacang lan wijen digoreng sangan banjur digongsa.

4.Emping ketan(ketan mentah kagoreng sangan dikrawu kasisiran gula jawa)

5.Tumpeng robyong(tumpeng diwadhahi cething,didedeki endhog wajar,iwak,trasi,brambang lan lomdok,disunduki,lomboke ana ing dhuwur dhewe,banjur kacublesake ing pucuking tumpeng.Dene ing kiwa tengene mubeng dicublesi,sundukan gereh,krupuk lan janganan kayata: kacang,kobis,lan sapanunggalane).

6.Penyon(glepung beras dijuri banyu,digawe rupa moncawarna,kuning,ireng,putih,lan sapanunggalane,dilentreng-lentreng sap sapan,banjur didang,diiris-iris).

7.Sampora(glepung beras dijuri santen,diemba bathok mengkurep,ing njero digulani banjur kalangseng).

8.Pring sadhapur(glepung beras mateng dijuri banyu,kapetha tumpeng cilik 9 jodo,banjur ditancepi ,

Sawise siram resik,banjur diwuloni dhukun lan banjur salin mancawarna pasatan,diubedi lawe abang,putih,ireng,nanging nglowong adoh lan weteng,banjur maratuwane utawa dhukune nibakake trobong(piranti ngikal lawe) kang nampani tropong biyune dhewe utawa dhukune ,karo muni:lanang arep,wadon arep,janji slamet.Banjur nibakake cengkir gadhing kagambar kamajaya ratuh,janaka sambadra,utawa panji lan candrakirana,uga muni:yen lanang kaya:kamajaya,arjuna utawa panji,yen wadon kaya:ratih,sembadra utawa candrakirana.

Sawise banjur mlebu ngomah ngadeg sangareping patanen(senthong tengah) ing kono wis disehiyani tapih lan kemben pitu-pitu,dienggo ganti-ganti kakendhokake bae,nganggo sapisan,ing kono para sepuh ana kang ngelokake:durung patut,banjur diplotroake,salin seje-sejene iya diaruh-aruhi maneh yen durung patut,mangkono sateruse nganti kaping pitu anggone salin,meksa durung kabenaran,nganti tapih kembene nglumbruk ora kena disingkirake,sarta banjur dilungguhi.Sawise mangkono banjur nganggo-nganggo sandhangan kang sabenere,yaiku tapih bathik tuntrum,kemben dringin,tanpa klambi lan ora kena nganggo:suweng,ali-ali,gelang kalung lan kembang,banjur dielokake:wis patut,wis patut.