No.63 Rencanane bayi lahir

No.63 Rencanane bayi lahir

Kang anggoda para dewa,utusane sanghyang siwa,yen bayi lahir lagi oleh.

Sawengi ,kang ngrencana bathara kala,rupa asu ajag tekane surup srengenge,tulake lawang-lawang obongana wlirang,sajroning omah oborana blarak sawengi ping telu,sajene sega punar iwak ati saundhuhan,kinang,pangilon,kelut,sapu gerang,kendhi,papan damar neng dhaganing bayi,bapakne ngubengana omah lan muji mangkene: Akala nama siwa.

Rong bengi,kang ngrencana bathara brama rupa sapi,tekane sirep wong,tulake lawang didodoki godhong nanas dilonthengi: putih lan ireng,ngobong kulit brambang,jeron omah diobori nganggo blarak sawengi ping telu,sajene:sega abang lawuhe kuluban,kinang,pengilon,sapu gerang,papan kendhi,damar neng dhaganing bayi,bapakne ngubnegi omah lan muji mangkene: Hong brama sia yama swa henu.

Telung bengi,bathara wisnu rupa celeng,tekane tengah wengi,tulake pipi lawang dekekana ri widara,lan ngobong godhong tanjung,sajroning omah diobori nganggo blarak sawengi ping telu.Sajene: sega irang iwak banyu,kinang,menyan madu,kembang boreh,kelut(sapu),papan pengilon,sapu gerang neng,dhaganing bayi,damar,bapakne ngubengi omah lan muji mangkene: Oma suyuna manta slano slana.

Patang bengi,bathara guru rupa manuk perkutut,lan bathara mahadewa rupa wedhus,apa dene bathara yama rupa sanggira,bathara brama rupa sapi,bathara kuwera rupa tikus,bathara pritanjala rupa manuk emprit,bathara langsur rupa menjangan,bathara kala rupa asu,bathara ludra rupa sapi handini,bathara surya rupa ula,bathara candra rupa kucing.Tutulake omah dikenthengi lawe wenang mubeng,sawengi ora kena turu,ngundanga sanak karuhe supaya ngrewangi melek.Bayi kudu dipangku muput,gedheg omah disemburi lingo bengle lan bawang,pujine: Hong,hong ,ywan ywan,siwah boja bujanaki,tamar wana,maswala,ora kena mateni kutu-kutu walang ngataga,semut,tinggi,kemut lan sakabehe bae,sanajan gegremetane kang lembut banget uga ora kena den pateni.

Kang padha ngrencana mau sawengi kudu dibagekake kaping telu,sambat arane sang kala katung mangkene mantrane:

Sapisan ,ing wektu suruping srengenge,mantrane: Ahang kona ristikane sediya ayu,sun iya harja,muliha mengko padha tekamu tan anggegawa ala lungamu uga aja anggegawa ala.

Kapindho ing wektu tengah wengi mantrane: Ahang,komes mateka ing kene sediya harja,ingsun iki iya harja,mulia bareng tekamu,tekamu ora anggegawa mulihmu uga aja anggegawa.

Kaping telune,ing byar rahina mantrane: Ahang kanu raswa rawuh,sediya hayu,sun iya harja,mulia bareng saiki,tekamu ora anggegawa,mulihmu uga aja anggegawa.

Anggone mbagekake yaiku anggone mantrani seru kaya dene wong nyentak.